Nadan amba koro

Nadan amba koro

Mini ama mafa daiming han i jasei orho be bilahakv, boihon sihabuhakv, baibi jasei tulergi weile de dafi, mini ama mafa be daiming gurun waha, tere emu.

Tuttu waqibe, bi geli sain banjire be buyeme wehei bithe ilibume, daiming, manju yaya han i jase be dabaqi, dabaha niyalma be saha niyalma waki, safi warakv oqi, warakv niyalma de sui isikini seme gashvha bihe. Tuttu gashvha gisun be gvwaliyafi, daiming ni qooha jase tuqifi yehe de dafi tuwakuyame tehebi, tere juwe koro.

Jai qing ho qi julesi giyang dalin qi amasi aniya dari daiming gurun i niyalma hvlhame jase tuqifi, manju i ba be durime quwangname nungnere jakade, da gashvha gisun bihe seme jase tuqike niyalma be waha mujangga, tuttu waha manggi, da gashvha gisun be daburakv, ainu waha seme guwangning de takvrame genehe mini gangguri, fanggina be jafafi sele futa hvwaitafi mimbe albalame mini juwan niyalma be gamafi jase de wa seme wabuha, tere ilan koro.

Jase tuqifi qooha tuwakiyame tefi, mini jafan buhe sargan jui be monggo debuhe, ere duin koro.

Udu udu jalan halame han i jase tuwakiyame yehe qaiha, fanaha, sanqara ere ilan golo i manju i tarifi yangsaha jeku be gaiburakv, daiming gurun i qooha tuqifi boxoho, tere sunja koro.

Jasei tulergi abkai wakalaha yehe i gisun be gaifi ehe gisun hendume bithe arafi niyalma takvrafi mimbe haqin haqin i koro arame girubuha, tere ninggun koro.

Hada i niyalma yehe de dafi minde juwe jergi qooha jihe bihe, bi karu dailara jakade, abka hada be minde buhe, abkai buhe hada be daiming han geli hada de dafi mimbe ergeleme ini bade unggi seme unggihe, mini unggihe hada i niyalma ishunde dailambikai, abkai wakalaha niyalma anabumbi buqembi, abkai urulehe niyalma etembi banjimbi kai. Dain de waha niyalma be weijubure, baha olji be bederebure kooli bio? Abkai sindaha amba gurun i han seqi, gubqi gurun de gemu uhereme ejen dere, mini qanggi de ainu emhun ejen? Neneme hvlun gemu emu iqi ofi, mimbe dailaha, tuttu dain deribuhe, hvlun be abka wakalaha, mimbe abka urulehe, ere daiming han abka de eljere gese abka i wakalaha yehe de dafi, waka be uru, uru be waka seme ainu beidembi? Tere nadan koro.

Ere daiming gurun mimbe gidaxaha girubuha ambula ofi bi dosorakv, ere nadan amba koro de dain deribumbi seme bithe arafi abka de hengkileme bithe deijihe.